Thursday, August 6, 2015

ಅಲ್ಲಲ್ಲಿ ಪಿಸುಗುಡುತ್ತಿದೆ ಮತ್ತದೇ ... ನಿನ್ನ ನೆನಪು... !

ಖಾಲಿ
ಖಾಲೀ ಹೃದಯ ..  ಸುತ್ತಲೂ ಕತ್ತಲು 
ಅತ್ತ 
ದೂರ ಆಗಸದಿ
ಚುಕ್ಕಿ 
ತಾರೆಗಳ
ಮಿನು
ಮಿನುಗುವ ಮಿಣುಕು ನಗು...

ಅಲ್ಲಲ್ಲಿ
ಪಿಸುಗುಡುತ್ತಿದೆ  ಮತ್ತದೇ  ನಿನ್ನ  ನೆನಪು... !

ಒಂಟಿ
ಮನದ..
ಬಿಗಿದ ತುಟಿಯ ನಿಟ್ಟುಸಿರಲಿ..
ಬಿದಿಗೆ 
ಚಂದ್ರಮನ
ಬೆಳ್ಳಿ ಬೆಳದಿಂಗಳ ಬೆಳಗು....

ಅಲ್ಲಲ್ಲಿ
ಗುನು
ಗುನುಗುತ್ತಿದೆ  ಮತ್ತದೇ ನಿನ್ನ ನೆನಪು.... !





ರೂಪದರ್ಶಿ :: ದೀಪ್ತಿ ನಾಗೇಂದ್ರ 
(ಭರತ ನಾಟ್ಯ ಹಾಗೂ  ನಾಟಕ ರಂಗ ಪ್ರತಿಭೆ)

Wednesday, June 3, 2015

ಅಧರದಲಿ ಬಚ್ಚಿಟ್ಟ ಮಧುರ ಮಾತುಗಳ ಹಾಗೆ...

ಅಧರದಲಿ
ಬಚ್ಚಿಟ್ಟ
ಮಧುರ  ಮಾತುಗಳ ಹಾಗೆ
ಮೌನ ಕಣೆ 
ನಿನ್ನ 
ನೆನಪುಗಳು...

ಖಾಲಿ
ಖಾಲಿ ಏಕಾಂತದಲಿ
ಚುಕ್ಕಿ
ತಾರೆಗಳು ಕತ್ತಲಲಿ ಹಾಡುತ್ತವಲ್ಲೇ...
ನೀ
ಬಿಟ್ಟು 
ಹೋದ ನಗುವಿನ ಹಾಗೆ....

ಬಾ
ತಬ್ಬಿಬಿಡು ನನ್ನೆದೆಯ..
ಬೆಳ್ಳಿ
ಬೆಳದಿಂಗಳು 
ನನ್ನ
ಒಂಟಿತನವ 
ಆವರಿಸುವ ಹಾಗೆ...






Monday, March 23, 2015

ಒಂಟಿ ಕತ್ತಲಲಿ ಸಾವಿರ ಆಸೆಗಳ ಮಿನುಗು ... !

ಒಂಟಿ
ಕತ್ತಲಲಿ
ಸಾವಿರ ಆಸೆಗಳ ಮಿನುಗು ...
ನಿನ್ನ ಕಣ್ಣು....

ಮತ್ತೇಕೆ ಮಾತು..
ನಲ್ಲೆ
ಮತ್ತೇರುವ ಮೌನವೇ ಸಾಕು....

ಹೂ
ನಗು ಬಿರಿದು ಅರಳಲಿ
ಹರಡಲಿ
ಕಂಪು ಕೆಂದುಟಿಯಲಿ....

ಮತ್ತೇಕೆ ಮಾತು 
ನಲ್ಲೆ
ಮತ್ತೇರುವ ಮೌನವೇ ಸಾಕು..... 


(ರೂಪದರ್ಶಿ  ::: "  ನಾಗಶ್ರೀ  "
ಕಿರು ತೆರೆ ಮತ್ತು ಯಕ್ಷಗಾನ ಪ್ರತಿಭೆ )


Friday, February 13, 2015

ಮೆಲ್ಲನೆ ಮುದ್ದು ಮುತ್ತಿಡುವೆ ಬಾ .... ಈ ಮತ್ತಿನ ಕಣ್ಣಿನಲಿ.. !

ತುಟಿಯಲಿ
ಇದೀಗ
ಬಿರಿದ ಮೊಗ್ಗಿನಂತೆ
ಒಳಗೊಳಗೆ 
ನಗುವೆಯಲ್ಲೊ...
ನನ್ನ
ನಾಚಿ ಕೆಂಪೇರಿದ ಕೆನ್ನೆಗಳಲಿ...

ಅತ್ತಿತ್ತ 
ಸುಳಿದಾಡಿ 
ಮೆಲ್ಲನೆ ಮುದ್ದು ಮುತ್ತಿಡುವೆ 
ಬಾ
ಈ ಮತ್ತಿನ ಕಣ್ಣಿನಲಿ..

ಬಾ
ಬಾರೋ ಹುಡುಗಾ...

ಎಷ್ಟೂ 
ಅಂತ ಮುಚ್ಚಿಡಲೊ
ಬಚ್ಚಿಟ್ಟ 
ನಿನ್ನ  ಹುಚ್ಚು  ಕನಸುಗಳನು ?




Wednesday, December 24, 2014

ನನ್ನ... ಚುಕ್ಕಿ ಚಂದ್ರಮ ಬೆಳ್ಳಿ ನಗು ನಗುವಾಗ...


ಹೇಗೆ 
ಹೇಳಲೇ  ಹುಡುಗಿ 
ನನ್ನೀ
ಬಚ್ಚಿಟ್ಟ ಭಾವಗಳ 
ಢವ 
ಢವಗಳ ಗದ್ದಲದಿ 
ನನ್ನೊಳಗಿನ ಮಾತುಗಳ 
ಮೌನ
ಮೌನವಾಗುವ ಮುನ್ನ.... 


ಒಮ್ಮೆಯಾದರೂ
ಬಾ
ನನ್ನ 
ಈ 
ಒಂಟೀ ಭಾವಗಳು
ಕತ್ತಲಲಿ
ತಾರೆಗಳ  ಎಣಿಸುವಾಗ.. 

ಬೆಳ್ಳಿ
ಬೆಳದಿಂಗಳಲಿ ಬಿದಿಗೆ ಚಂದ್ರಮ 
ಚುಕ್ಕಿ 
ನಗು  ನಗುವಾಗ... 

ಬಾ .. 
ಬಾರೇ  ಒಮ್ಮೆಯಾದರೂ 
ನೀ .... 

Wednesday, September 17, 2014

ಕಂಗಳಲಿ ನಾಚಿ.. ರಂಗಾದ ಮುತ್ತು...

ತುಟಿಗೆ
ಬಾರದ ಮಾತು
ಭಾವ...

ನನ್ನೆದೆಯ 
ಢವ 
ಢವದಲಿ ಹುದುಗಿ ಹೋಗುವ ಮುನ್ನ...


ಕೆನ್ನೆಯಲಿ ನಾಚಿ  ರಂಗಾಗಿ..
ಈ 
ನಿನ್ನ 
ಕಂಗಳಲಿ
ಮುದ್ದಾದ 
ಮುತ್ತಾಗಬಾರದೇನೆ ಹುಡುಗಿ... ?




ರೂಪದರ್ಶಿ :::::: "ಕುಮಾರಿ ಅರ್ಪಿತಾ "
                           ಯಕ್ಷಗಾನ ಪ್ರತಿಭೆ 

Friday, September 5, 2014

ಬೆಳ್ಳಿಚುಕ್ಕಿ... ಮಿನುಗು ತಾರೆಗಳ ತಾರೆ... ನೀ ತಾರೆ... !

ಬಾ 
ಬಾರೆ ಹುಡುಗಿ 
ಭಾವ 
ಬಂಧನಕೆ ಭಾವವಾಗಿ..  

ನನ್ನೆದೆಯ ಮೌನದಲಿ
ನೀ
ಮೌನವಾಗಿ...

ತೇಲು
ಕನಸುಗಳ ರೆಕ್ಕೆಯಾಗಿ..

ನನ್ನ
ಕತ್ತಲ
ಮಾತಲಿ  ಮಿನುಗುವ
ಬೆಳ್ಳಿಚುಕ್ಕಿ 
ತಾರೆಗಳ ತಾರೆ... 
ನೀ
ತಾರೆ...

ಬಾ 

ಬಾರೆ ಹುಡುಗಿ 
ಭಾವ ಗೀತೆಯಾಗಿ.. 




                                                    ರೂಪದರ್ಶಿ  :::  " ಕುಮಾರಿ ಅರ್ಪಿತಾ "
                                                                               ಯಕ್ಷಗಾನ ಪ್ರತಿಭೆ